நீங்கள் தேடியது "உலகக்கோப்பை ஹாக்கி"

புவனேஷ்வர்:

14-வது உலககோப்பை ஹாக்கி தொடர் ஒடிசா தலைநகர் புவனேஷ்வர் நகரில் நடைபெற்று வருகிறது. இதன் இறுதிப்போட்டி இன்று  இரவு 7 மணிக்கு நடக்கிறது. இதில் நெதர்லாந்து- பெல்ஜியம் அணிகள் மோதுகின்றன. நெதர்லாந்து அணி 7-வது முறையாக இறுதிப் போட்டியில் ஆடுகிறது. பெல்ஜியம் முதல் முறையாக இறுதிப்போட்டிக்கு தகுதி பெற்றுள்ளது.

நெதர்லாந்து அணி 4-வது முறையாக உலக கோப்பையை வெல்லும் ஆர்வத்துடன் இருக்கிறது. அந்த அணி 1973, 1990, 1998-ம் ஆண்டில் சாம்பியன் பட்டம் பெற்று இருந்தது. 3 முறை இறுதிப்போட்டியில் (1978, 1996, 2012) தோற்று இருந்தது.

நெதர்லாந்து அணி ‘லீக்’ ஆட்டங்களில் 7-0 என்ற கோல் கணக்கில் மலேசியாவையும், 5-1 என்ற கணக்கில் பாகிஸ்தானையும் வீழ்த்தி இருந்தது. ஜெர்மனியுடன் 1-4 என்ற கணக்கில் தோற்றது. 2-வது சுற்றில் 5-0 என்ற கணக்கில் கனடாவையும், கால்இறுதியில் 2-1 என்ற கணக்கில் இந்தியாவையும் தோற்கடித்தது. அரைஇறுதியில் 4-3 என்ற கணக்கில் (பெனால்டி ஷூட்) நடப்பு சாம்பியன் ஆஸ்திரேலியாவை வீழ்த்தியது.

பெல்ஜியம் அணி ‘லீக்’ ஆட்டத்தில் 2-1 என்ற கணக்கில் கனடாவையும், 5-1 என்ற கணக்கில் தென்ஆப்பிரிக்காவையும் வீழ்த்தியது. இந்தியாவுடன் 2-2 என்ற கணக்கில் ‘டிரா’ செய்தது. 2-வது சுற்றில் பாகிஸ்தானை 5-0 என்ற கணக்கிலும், கால்இறுதியில் ஜெர்மனியை 2-1 என்ற கணக்கிலும், அரை இறுதியில் இங்கிலாந்தை 6-0 என்ற கணக்கிலும் தோற்கடித்தது.

இரு அணிகளும் சமபலம் பொருந்தியவை. இதனால் இறுதிப்போட்டி மிகவும் விறுவிறுப்பாக இருக்கும் என்று எதிர்பார்க்கப்படுகிறது. 3-வது இடத்துக்கான போட்டியில் ஆஸ்திரேலியா- இங்கிலாந்து அணிகள் மாலை 4.30 மணிக்கு மோதுகின்றன.